舊事生活

【文、圖∕薛常威∕國立中央大學客家語文暨社會科學學系在職專班碩士】

 

　　「舊事生活」在2017年成立，摎以前紹介過个「一起灶」共樣，在新竹竹東火車頭出來，左手片个竹東文創藝術村裡肚。「舊事生活」係一間用舊个鐵路局宿舍重新整理起來个餐廳，看名斯知，舊事生活係用以前人用過个凳桌、箱仔、電視、RADIO、電扇來做裝潢，分人客有來到舊時代个感覺。



　　 創辦人係後生人吳界，佢小个時節長透去竹東親戚屋下尞，發現竹東該片个客人當好食浮菜。吳界想愛表現在地个客家人个特色菜，斯開發出當多樣个浮菜。像客家三角仔，斯係華語講个水晶餃，用浮个方式來煮，還有其他个像浮水餃，浮豆腐該兜。佢兜還設計幾路特別、有客家特色个菜，像「舊事愛分享」、「舊事一直吃」，還過用客家擂茶改良過个「擂茶冰沙」、「擂茶歐蕾」這兜當生趣个涼水。



　　 以前竹東火車頭旁脣當恬靜，無麼个人行過去。正準備開業該下，吳界講，戴竹東个阿姑䟓䟓走去尋佢，講該位無人會去，開餐廳毋會成。毋過吳界還係盡量去做，摎這間當老、當舊个建築重新整理到當靚、當有古早味个餐廳，今這下嗄變到後生人、文青、網紅翕相、打卡个所在。乜有當多電視台來這位做戲拍片。

　　「舊事生活」乜有辦當多生趣好搞个活動分社區民眾參加，像「網美拍照攻略」教大家翕相，「舊事二手市集」來分大家分享自家屋下个舊東西，分大家來尋寶物。



　　 吳界當客氣講，該下堵好新竹縣政府有一隻老屋翻新个計畫，佢堵好堵著這機會。毋過，𠊎想較重要還係後生人个膽量摎熱情，正做得摎這間餐廳經營到恁好、恁成功。
　　
薛常威先生 聲檔 —　舊事生活（海陸腔）





　

▲BACK